ДУШАНБЕ, 19 янв — Sputnik. Хадамоти консулии сафоратии Тоҷикистон дар русия аз Маркази нигаҳдории муваққатии хориҷиён воқеъ дар деҳаи Сахарово боздид намуд. хабар медиҳад котиботи ин ниҳод.
Бар хабари манбаъ, намояндагони консулгарӣ бо мақсади шинос шудан ба шароити нигаҳдории муҳоҷирони тоҷик аз ин марказ дидан намуданд.
Ин ниҳод расман шумораи муҳоҷирони тоҷик, ки муваққатан ба далели нақзи қавонини Русия дар ин марказ қарор доранд, ифшо накард. Танҳо зикр намуд, ки намояндаи Хадамоти консулии сафорат бо роҳбари муассисаи мазкур Алексей Лагода мулоқот анҷом дод.
"Зимни мулоқот масоили марбут ба ҳуҷҷатгузорӣ ва зудтар ба Тоҷикистон фиристодани шаҳрвандони муваққатан боздоштгардида мавриди баррасӣ қарор гирифт", - омадааст дар хабарнома.
Зимнан, пас аз гуфтушунид миёни роҳбарияти марказ ва намояндаи хадамот 10 муҳоҷири тоҷик ба Тоҷикистон фиристода шуданд.
Манбаъ меафзояд, намояндаи хадамот бо муҳоҷирони тоҷики дар боздоштгоҳ қарордошта низ вохӯрӣ анҷом дода, ба онҳо барои минбаъд такрор накардани қоидавайронкуниҳо вобаста ба будубош дар қаламрави русия тавсияҳо пешниҳод намуд.
Гуфта мешавад, ба муҳоҷирони тоҷик маводи ғизоӣ ва маҳсулоти мавриди ниёз тақсим карда шуд.