Дар толори "Известия холл"-и Маскав консерти ҳунарманди номдори ду аср, маэстро Далер Назаров баргузор шуд.
Намояндагони миллатҳои гуногун аз қабили русҳо, ӯзбекҳо, қирғизҳо ва дигарон ҷамъ омада буданд.
"Моро ба ин ҷо ишқ овард ва мо барои васл кардан омадаем", - гуфт Назаров.
Ҳунарнамоии қаблии Далер Назаров дар пойтахти Русия соли 2019 баргузор шуда буд ва мухслисон консерти навашро дер интизор буданд.
Бархе аз мухлисони Далер Назаров чиптаҳоро ду сол пеш харидорӣ карданд, вале то кунун интизори консерт буданд.
Аксари тамошобинон, бо телефонҳои ҳамроҳ дар шабакаҳои иҷтимоӣ консертро ба дӯстонашон намоиш медоданд.
Барои тоҷикони муқими Маскав ин консерт муҳимтарин чорабинии фарҳангии соли 2022 арзёбӣ гардидаст.
Ӯ бо сурудҳои "Бедор шав", "Сад роҳи интизорӣ", "Рӯдакӣ", "Биёед", "Агар он турки шерозӣ" ва "Нури Худо" то тору пуди мухлисон роҳ меёфту онҳоро то авҷи фалак мерасонд.
Бузургтарин мухлиси Далер аз 80 гузашта буду хурдтаринаш ҳамагӣ ду сол дошт.
Далер ба забонҳои тоҷикӣ, ӯзбекӣ, русӣ ва шуғнонӣ сароид. Маълум буд, ки аксарияти мухлисон ин забонҳоро хуб балад набуданд, вале ҳамагонро мусиқии асил якҷо карда буд.