ДУШАНБЕ, 7 дек — Sputnik. Кишвардори Русия Владимир Путин эҳтимоли эълони басиҷи навбатиро шарҳ дод.
Ба гуфти президенти Русия, аз 300 ҳазор сафарбаршуда, танҳо 150 ҳазори онҳо дар майдони ҷанг ҳастанд ва 150 ҳазори дигар аз омӯзиш мегузаранд.
Ба ақидаи ӯ дар чунин шароит, имрӯзҳо суҳбат дар бораи сафарбарсозии навбатӣ маъно надорад.
"Дар шароити кунунӣ суҳбат дар бораи чораҳои иловагии сафарбаркунӣ маъно надорад - ва имрӯз давлат ва вазорати дифоъ ба ин ниёз надорад", - гуфт ӯ.
Пештар, котиби матбуотии Кремл, Дмитрий Песков, маълумотро дар бораи паёми президенти Русия, ки дар он гӯиё раисҷумҳур, Владимир Путин"басиҷи навбатӣ" эълон мекунад, бепоя хонд.
Маврид ба зикр аст, ки Владимир Путин рӯзи 21 сентябр аз сафарбаркунии нисбӣ дар кишвар хабар дода буд.
Тибқи фармони ӯ, танҳо шаҳрвандони Федератсияи Русия, ки дар захира ҳастанд ва дар навбати аввал онҳое, ки дар сафи қувваҳои мусаллаҳ хидмат кардаанд, дорои ихтисосҳои муайяни ҳарбӣ ва таҷрибаи дахлдор мебошанд, даъват шуданд. Дар умум нақшаи даъвати 300 ҳазор нафар таъйид шуда буд.
Вазорати мудофиаи Русия аллакай 28 октябр аз анҷоми басиҷи нисбӣ дар кишвар гузориш дода, афзуд, теъдоди муқарраршуда аллакай ба артиш сафарбар гардиданд.
Теъдоди сафарбаршудаи шаҳрвандон ҳамагӣ ҳудуди як дарсад аз зарфияти умумии нерӯҳои захиравии Русия арзёбӣ мешаванд, ки то 25 млн нафар гуфта мешаванд.