ДУШАНБЕ, 29 ноя — Sputnik. Раиси Палатаи ҳисоби Русия Алексей Кудрин истеъфо дод.
Дар ин бора ин мансабдори рус дар Telegram-канали шахсии худ хабар додааст.
Ба гуфтаи оқои Кудрин, вай бо тартиби муқарраршуда ба раисиҷумҳури Русия Владимир Путин аризаи истеъфоашро ирсол кардааст.
"Мехоҳам ба тарҳҳои бузурге таваҷҷуҳ кунам, ки ба рушди ташаббусҳои бузурги хусусӣ рабт доранд, аммо дар баробари ин ба мардум таъсири назаррас мерасонанд. Аз ин рӯ, ман ин мақомро тарк мекунам", - афзуд ӯ.
Гуфта мешавад, ки пешниҳоди барканории ин мансабдор то 30 ноябр баррасӣ шавад. То охири сол рӯйхати номзадҳо ба мақом, ки аз ҷониби палатаи болоии порлумон таҳия мешавад ба президенти Русия ирсол мешавад.
Алексей Кудрин зиёда аз 25 сол дар бахши давлатӣ кор кардааст. Ӯ 22 майи соли 2018 ба мақоми раиси Палатаи ҳисоб таъйин гардид.
Қаблан расонаҳо дар бораи эҳтимоли рафтани ӯ хабарҳо нашр карданд.
Ёдовар мешавем, ки оқои Кудрин дар гузашта вазири молияи Русия буд ва ба гуфтаи бархе аз коршиносон ӯ дар ин мақом бисёр самаранок кор мекард.