ДУШАНБЕ, 21 ноя – Sputnik. Ахиран дар Вазорати меҳнат, муҳоҷират ва шуғли аҳолии Тоҷикистон муаррифии лоиҳаи Барномаи рақамии бақайдгирии бекорон баргузор гардид.
Дар ин ҷаласа рӯнамои функсияҳои “Портали бақайдгирии бекорон” ва “Методологияи таҳияи платформа” манзур гардида, қайд гардид, ки барномаи мазкур шафофият ва дақиқияти фаъолияти мақомоти шуғли аҳолӣ, дастрасии шаҳрвандони бекор ба хизматрасониҳои мақомоти шуғли аҳолиро таъмин менамояд.
Гуфта шудааст, ки лоиҳаи мазкур бо дастгирии Барномаи СММ омода шуда истодааст.
Ёдовар мешавем, ки чанде пеш раисҷумҳури Тоҷикистон гуфта буд, ки давоми солҳои 2020-2021 ва нимсолаи якуми соли соли 2022 ба мақомоти меҳнат ва шуғли аҳолӣ 353 ҳазору 402 нафар шаҳрванд муроҷиат намуданд.
Вай афзуд, ки дар доираи татбиқи Барномаи давлатии мусоидат ба шуғли аҳолӣ дар маҷмуъ 179 ҳазору 240 нафар бо ҷойҳои корӣ таъмин гардид.
“Ба 32 ҳазору 358 шаҳрванд ба муддати 3 моҳ кумакпулӣ барои бекорӣ пардохт карда шуд”,- зикр крд Эмомалӣ Раҳмон.
Вай илова кард, ки дар солҳои 2020-2021 ва семоҳаи якуми соли 2022 дар Тоҷикистон дар соҳаҳои иқтисодиёт 421 ҳазору 726 ҷои нави корӣ таъсис дода шуд, ки аз ин 156 ҳазору 623 ҷойи кори доимӣ мебошад.