Дар назди оромгоҳи Шоҳчароғ дар шаҳри Шерози Эрон тирпарронии мудҳиш рух дод. Ин мақбара ҳамчун масҷид истифода мешавад ва зиёратгоҳи мусулмонони шиъа мебошад.
Се марди мусаллах ба сӯи саҳни шафати он оташ кушоданд. Ду нафари онҳо боздошт ва сеюмӣ дар ҷустуҷӯ қарор дорад.
Фоҷеаи мудҳиш соати 17:45 ба вақти маҳаллӣ рух додааст.
Дар натиҷаи ин ҳамла 15 нафар кушта ва ҳудуди 40 нафар маҷрӯҳ шуданд. Дар миёни қурбониёни ҳамла як кӯдаки хурдсол низ ҳаст.
Дар изҳороте, ки як манбаи интернетии маҳаллӣ нашр кард, яке аз созмонҳои террористӣ масъулияти ин ҳамларо бар уҳда гирифтааст.
Раисиҷумҳури Эрон Иброҳим Раисӣ ба хонавода ва наздикони қурбониёни ҳамла ба оромгоҳ изҳори ҳамдардӣ кард. Вай гуфт, ки нерӯҳои амниятии Эрон ба афроде, ки ин ҳамларо созмон додаанд, "вокуниши дандоншикан" хоҳанд дод.
Айни замон мақомоти маҳаллӣ иддао доранд, ки вазъ зери назорат аст.