ДУШАНБЕ, 30 сен – Sputnik. Барои ба эътидол овардани равобити Арманистону Озарбойҷон кумаки кишварҳои ИДМ муҳиму лозим аст, гуфт вазири хориҷаи Русия Сергей Лавров.
“Ҳоло имконияти истифодаи нозирони Созмони Паймони Амнияти Дастаҷамъӣ барои мусоидат ба фароҳам овардани шароит барои иҷрои созишномаҳои раҳбарони Озарбойҷон, Арманистон ва Русия, аз ҷумла дар бораи делимитатсияи марзи Арманистону Озарбойҷон ва дар маҷмӯъ, ба эътидол овардани равобит миёни Боку ва Ереван, аз ҷумла имзои созишномаи мувофиқ баррасӣ мешавад.”, - гуфт Лавров дар Маскав дар нишасти раҳбарони ниҳодҳои вижаи кишварҳои ИДМ.
"Фикр мекунам, ки ба дастгирии ИДМ дар ҳалли ин масъала нмёз дорем", - афзуд Лавров.
Ин дар ҳолест, ки ахиран раисҷумҳури Русия, Владимир Путин низ гуфт, кишварҳои Ғарб талош доранд дар қаламрави кишварҳои ИДМ низоъ ба вуҷуд биёранд.
“Рақибони мо дар пайи ҳадафҳои худ ҳастанд. Онҳо омодаанд, ҳар касе ва ҳар кишварро зери балое гузоранд ва ин кишварро ба маркази бӯҳрон табдил диҳанд. Инқилобҳои ранга роҳандозӣ мекунанд ва қатлу кушторро ба роҳ мемонанд. Мо инро на як бору ду бор дидаам”, — гуфт Путин.
Ба гуфтаи раҳбари Русия, ин ба хотири ҷилавгирӣ аз ташаккули низоми одилонаи ҷаҳонӣ сурат мегирад - Ғарб талош дорад ихтилофоти кӯҳнаро дубора ба вуҷуд биёрад.
Маврид ба зикр аст, ки феълан дар Маскав ҷаласаи роҳбарони мақомоти махсус ва амниятии кишварҳои узви ИДМ ҷараён дорад, ки аз Тоҷикистон дар он раиси КДАМ ҶТ, Саймумин Ятимов иштирок дорад.