ДУШАНБЕ, 10 сен — Sputnik. Ҳушдори раисҷумҳури Русия Владимир Путин Иттиҳодияи Аврупоро маҷбур кард, ки аз яке аз тасмимҳои бунёдии худ даст кашад, менависад "The Telegraph".
Муаллифи нашрия Том Рис тавзеҳ медиҳад, ки сухан дар бораи ҳадди ниҳоии нархи газ меравад, ки ахиран фаъолона мавриди баррасӣ қарор гирифт.
"Брюссел пас аз ҳушдори Путин дар бораи қатъи интиқол дар сурати қабули чунин тасмим ба маҳдуд кардани нархи гази Русия шурӯъ накард", - гуфтааст таҳлилгар.
Ба гуфтаи муаллиф, вазирон дар як нишасти ахир аз Комиссиюни Аврупо хостанд, тарҳи муфассалеро барои коҳиши таниш дар бозорҳои энержӣ таҳия кунад.
Рис қайд мекунад, ки Аврупо дар ҳоли ҳозир дар як бӯҳрони шадид қарор дорад, ки аз сабаби болоравии нархи нерӯи барқ ва норасоии он ба вуҷуд омадааст.
"Вазирон дар Брюссел ба таври фаврӣ саъй доранд, ки ба зимистони сахт омода шаванд", - хулоса мекунад таҳлилгар.
Қаблан вазирони молияи G7, ки Бритониё, Олмон, Итолиё, Канада, ИМА, Фаронса ва Ҷопонро дар бар мегиранд, нияти худ барои ҷорӣ кардани маҳдудияти нархҳо ба нафти Русияро дар чаҳорчӯби тавсеаи таҳримҳо алайҳи Русия таъйид карданд.
Дар вокуниш ба ин Путин, ки дар Форуми иқтисодии шарқӣ суханронӣ карда, гуфт, ки Федератсияи Русия метавонад интиқоли сӯзишворӣ ба кишварҳоеро қатъ кунад, ки мақомоти онҳо сиёсатеро пеш мегиранд, ки боиси нақзи шартномаҳо мешавад.