ДУШАНБЕ, 23 авг — Sputnik. Ду мактаби русӣ дар Тоҷикистон аз Русия китобҳои нави дарсӣ дастрас намуданд, иттилоъ додааст намояндагии "Россотрудничество" дар кишвар.
Китобҳои дарсӣ ба мактаби миёнаи шаҳри Кӯлоб ва гимназияи давлатии ноҳияи Фархор, ки дар он тамоми таҳсилот бо забони русӣ сурат мегирад, супурда шуд.
“Асосан, ин китобҳои дарсӣ дар фанни риёзӣ, забони русӣ, адабиёт ҳастанд, ки ҳамагӣ тақрибан 900 китобро ташкил медиҳад”, - гуфт манбаъ.
Дар маросими супурдани китоб мактаббачагон, падару модарон ва намояндагони шуъбаи Ташкилоти умумироссиягии куҳансарбозони “Бародарии размӣ” иштирок доштанд.
Қобили зикр аст, ки аз 1 сентябр дар Тоҷикистон боз панҷ мактаби нави русӣ дар манотиқи мухталифи кишвар ба фаъолияти худ оғоз хоҳанд кард. Ҳукумати Русия барои сохтмон ва муҷаҳаз намудани онҳо бо таҷҳизоти лозима ҳудуди 150 миллион доллар ҷудо кардааст.
Ҳамин тариқ, муассисаҳои таълимӣ дар шаҳрҳои Бохтар, Душанбе, Кӯлоб, Турсунзода ва Хуҷанд дарҳои худро барои мактаббачаҳо боз хоҳанд кард.
Дар мактабҳои нав омӯзгорони рус таълим хоҳанд дод ва барномаи таълимӣ махсусан барои минтақаи Тоҷикистон мутобиқ карда мешавад.