ДУШАНБЕ, 4 авг — Sputnik. Як қатор кишварҳо, аз ҷумла Имороти Муттаҳидаи Арабӣ, Сурия, Қатар ва Арабистони Саудӣ мехоҳанд ба Созмони Ҳамкориҳои Шанхай ворид шаванд.
"Ҳудуди 10 кишвар барои баланд бардоштани мақоми худ дар СҲШ дархост равон кардааст. Дар байни онҳо намояндагони кишварҳои арабӣ: Сурия, Миср, Арабистони Саудӣ, Қатар, Аморати Муттаҳидаи Араб ҳастанд. Аз Осиёи Ҷанубу Шарқӣ Мянмар, Камбоҷа ва Непал. Аз кишварҳои ҳамсоя – Арманистон ва Озарбойҷон. Мо миқёси бесобиқаи таваҷҷуҳро ба СҲШ мебинем", - шарҳ дод як манбаи воломақом ба "Известия".
Ғайр аз ин Иморот хоҳиш кардааст, ки бидуни паси сар кардани расмиёти бюрократӣ, фавран мақоми аъзоро соҳиб шавад.
Феълан раёсати СҲШ-ро Ӯзбекистон бар ӯҳда дорад ва азм дорад ва аз 15 то 16 сентябр дар шаҳри Самарқанд Шӯрои сарони кишварҳои узви ин созмон дар назар аст.
Аз ҷумла ба нақша гирифта шудааст, ки дар ин ҷаласа, Эрон узви комилҳуқуқи Созмони Ҳамкориҳои Шанхай гардад.
СҲШ як созмони байнулмилалӣ аст, ки соли 2001 аз ҷониби раҳбарони Чин, Русия, Қазоқистон, Тоҷикистон, Қирғизистон ва Ӯзбекистон таъсис ёфтааст.
Кишварҳои нозир дар СҲШ Афғонистон, Беларус ва Муғулистон, ҳамзамон кишварҳои шарики Озарбойҷон, Арманистон, Камбоҷа, Непал, Туркия ва Шри-Ланка мебошанд.
Ҳоло ба СҲШ ҳашт кишвар – Ҳиндустон, Қазоқистон, Чин, Қирғизистон, Русия, Тоҷикистон, Покистон ва Ӯзбекистон шомиланд.