ДУШАНБЕ, 5 май — Sputnik. Рамазон Қодиров, раисҷумҳури Чеченистон дар шабакаи "Телеграм"-и худ видеоеро нашр кард, ки як гурӯҳи дигари ихтиёриён барои ширкат дар амалиёти вижа ба Украина рафтаанд.
Дар видео гуфта мешавад, ба ҳар яке аз ихтиёриён дар рӯзи сафар 300 ҳазор рубл ва минбаъд ҳамарӯза 53 доллари амрикоӣ дода мешавад. Ҳамчунин зикр гардид, ки онҳо бо шароити хуб ва се вақт хӯроки гарм таъмин хоҳанд шуд.
Дар видео ҳамчунин рақамҳои телефони тамос барои хоҳишмандони пайваст шудан ба амалиёти Русия дар Украина ҷо дода шудааст.
"Барои мубориза бо фашистон ҳазорон ҷанговари некхоҳ омода ҳастанд. Танҳо як ишора метавонад сафи онҳоро ба миллионҳо нафар расонад. Инро ман ҳамеша таъкид карда будам", - навиштааст Қодиров.
Қаблан Рамазон Қодиров, раисҷумҳури Чеченистон дар бораи омодагии даҳҳо ҳазор ихтиёрӣ аз Чеченистон хабар дода буд, ки мехоҳанд, дар амалиёти вижа барои безарарсозии Украина ширкат кунанд.
"Теъдоди ихтиёриён аз Ҷумҳурии Чеченистон, ки барои иҷрои фармони фармондеҳи олӣ дар Украина омодаанд, ба даҳҳо ҳазор нафар мерасад. Ҳар рӯз нерӯҳои амниятӣ мунтазири чунин фармон ҳастанд", — гуфт Қодиров дар шабакаи "Telegram"-и худ.
Вай афзуд, ин бачаҳо "на дар клавиатура навиштан, балки бо аслиҳаи оташфишони воқеӣ ва дақиқ "навиштан"-ро омӯхтаанд".
"Онҳо ба экрани телефони мобилӣ нигоҳ намекунанд, дар шабакаҳои иҷтимоӣ чизҳои бадахлоқона наменависанд, балки дар ҳаёти воқеӣ, дар майдони ҷанг фармонҳоро хомӯшона иҷро мекунанд. Онҳо дар умури ҳарбӣ таълим гирифтаанд ва интизоранд, ки ҳунари размии худро зудтар нишон диҳанд”, - афзуд Қодиров.