ДУШАНБЕ, 19 апр — Sputnik. Вазири корҳои хориҷии Русия Сергей Лавров гуфт, ки Маскав режими Украинаро тағйир доданӣ нест.
Дар ин бора РИА "Новости" бо такя ба мусоҳибаи вазир бо "India Today" хабар додааст.
"Мо режими Украинаро тағйир доданӣ нестем", - гуфт вазир дар мусоҳиба бо "India Today".
"Мо борҳо дар ин бора суҳбат кардем, мо мехоҳем, ки украиниҳо худашон тасмим бигиранд, ки чӣ гуна зиндагӣ кардан мехоҳанд", - гуфт ӯ.
Русия рӯзи 24 феврал амалиёти вижаро дар Украина оғоз кард. Кишвардори Русия Владимир Путин ҳадафи онро "ҳимояи одамоне номид, ки тӯли 8 сол аз сӯйи режими Киев мавриди таҳқиру наслкушӣ қарор гирифтаанд".
Барои ин, ба гуфтаи ӯ, дар назар аст, ки "нозизудоӣ ва ғайринизомикунонии Украина" анҷом шуда, тамоми масъулини "ҷиноятҳои хунини зидди мардуми осоишта" дар Донбасс ба ҷавобгарӣ кашида шаванд. Аммо дар бораи ишғоли Украина сухане нест, таъкид кард раисҷумҳури Русия.
Дар айни замон қувваҳои мусаллаҳи Федератсияи Русия вазифаи асосии марҳилаи аввали амалиёти махсусро анҷом додаанд. Онҳо иқтидори ҷангии Украинаро ба таври назаррас коҳиш доданд. Ҳадафи аслӣ дар Вазорати дифоъ озодсозии Донбасс номида шуд.