ДУШАНБЕ, 14 мар — Sputnik. Виктор Янукович, президенти собиқи Украина дар мусоҳиба бо РИА "Новости" гуфт, то ҳол имкони боздоштани фоҷеа дар ин кишвар вуҷуд дорад.
Ба гуфтаи Янукович, бояд ба ҳар қимате ки набошад, ба хунрезиҳо хотима бахшида шавад.
Вай қайд кард, ки Владимир Зеленский "мушовирон"-и гуногун дорад, аммо қимати масъулияти шахсии ӯ хеле бузург аст.
"Таърихи ин муноқиша хеле пеш, ҳашт сол пеш оғоз шуда буд. Бале, ҷангро дар соли 2014 на Зеленский, балки дабири собиқи Шӯрои амнияти миллӣ ва дифои Украина Александр Турчинов оғоз кард. Порошенко, президенти собиқ онро идома дод. Аммо Зеленский дар интихобот ваъда дод, ки ба ҷанг хотима мебахшад. Мардум ба ӯ бовар ва ӯро интихоб намуданд. Мутаассифона, ӯ низ мардумро фиреб дод. Аммо ҳоло ниқобҳо бардошта шуданд ва ҳанӯз имкони боздоштани фоҷеа вуҷуд дорад", - тавзеҳ дод Янукович.
Ёдовар мешавем, ки Русия субҳи панҷшанбеи 24 феврал амалиёти низомиро дар Украина оғоз кард. Президент Владимир Путин ҳадафи онро "ҳимояи одамоне номид, ки дар тӯли 8 сол таҳти таъқиб ва наслкушӣ аз ҷониби режими Киев қарор гирифтаанд".
Ба ин манзур, ба гуфтаи ӯ, “ғайринизомисозӣ ва нозизудоии Украина”, таҳвили муҷримони ҷангии масъул дар “ҷиноёти хуношом алайҳи сокинони мулкӣ”-и Донбасс ба додгоҳ барномарезӣ шуд.
Бинобар баёнияи Вазорати дифои Русия, нерӯҳои ҳарбии ин кишвар танҳо зерсохтҳои низомию низомиёни Украинаро ҳадаф қарор медиҳанд ва ин амалиёт шаҳрвандони мулкиро таҳдид намекунад.