ДУШАНБЕ, 3 мар — Sputnik. Артиши Русия барои берун овардани 588 шаҳрванди кишварҳои хориҷӣ аз Украина кумак кардаааст, гуфт генерал-полковник Михаил Мизинтсев, раиси Маркази миллии идораи дифоии Русия.
“Бо андешидани чораҳои муассир, аз ҷумла дар бораи таъмини амният аз тарафи қувваҳои мусаллаҳи Русия, бунёди долонҳои башардӯстона ва ҷорӣ намудани “режими хомӯшӣ”, даст кашидан аз истифодаи ҳама гуна силоҳи оташфишон ва амалиёти низомӣ дар ин авохир 588 нафар аз шаҳрвандони хориҷӣ аз минтақаҳои хатарноки Украина хориҷ карда шуданд”, - гуфт ӯ.
Миёни нафароне, ки аз Украина бароварда шуданд, шаҳрвандони Фаронса, Белгия, Италия, Лаҳистон, Швейтсария, Гурҷистон, Ҳолланд, ИМА, Юнон, инчунин кормандони намояндагиҳои САҲА ва СММ низ мебошанд.
Михаил Мизинтсев илова кард, ки шаҳрвандони хориҷӣ аз Киев, Харков ва Мариупол берун бурда шуданд.
Амалиёти вижаи Русия дар Украина
Русия амалиёти низомӣ дар Украинаро субҳи барвақти 24 феврал шуруъ кард. Раисҷумҳури Русия Владимир Путин ҳадаф аз онро “ҳимояти мардуме, ки тӯли ҳашт сол аз тарафи режими Киев мавриди тамасхур ва наслкушӣ қарор доштанд”, унвон кард.
Ба ин манзур, ба гуфтаи ӯ, “ғайринизомисозӣ ва нозизудоии Украина”, таҳвили муҷримони ҷангии масъул дар “ҷиноёти хуношом алайҳи сокинони мулкӣ”-и Донбасс ба додгоҳ барномарезӣ шуд.
Бинобар баёнияи Вазорати дифои Русия, нерӯҳои ҳарбии ин кишвар танҳо зерсохтҳои низомию низомиёни Украинаро ҳадаф қарор медиҳанд ва ин амалиёт шаҳрвандони мулкиро таҳдид намекунад.
Бо ҳимояти нерӯҳои ҳавоии ФР ҳуҷуми гурӯҳҳои ҶХД ва ҶХЛ доман мегустарад. Ин ҷо ҳарф дар бораи забти Украина нест, гуфт раисҷумҳури Русия.
Дар рӯзи панҷшанбеи 28 феврал ҳайатҳои Русия ва Украина дар вилояти Гомели Беларус музокирае баргузор карданд.
Он панҷ соат тӯл кашид. Тавре ёвари раисҷумҳури Русия Владимир Мединский гуфт, тарафайн кулли дастури корро баррасӣ ва нукотеро барои пешбинии мавозеи муштарак пайдо карданд.
Дидори баъдии ҳайатҳои русӣ ва украинӣ дар марзи Беларусу Лаҳистон баргузор мешавад.