ДУШАНБЕ, 28 фев — Sputnik. Ҷозеп Боррел, роҳбари дипломатияи аврупоӣ нияти интиқоли ҳавопаймоҳои ҷангии Иттиҳодияи Аврупо ба Украина дар доираи кӯмаки низомӣ ба ин кишварро эълон кард, иттилоъ додааст РИА "Новости".
"Мо ният дорем, ки Украинаро бо силоҳи марговар ва ҳатто ҳавопаймоҳои ҷангӣ таъмин кунем", - гуфтааст Боррел.
Қаблан раисҷумҳури Амрико Ҷо Байден ба Вазорати умури хориҷии Амрико дастур дода буд, ки барои Украина 600 миллион доллар ҷудо кунад.
Энтони Блинкен, вазири умури хориҷии Амрико эълом кард, ки Амрико нақшаи ироаи кумаки тақрибан 54-миллиондолларии башардӯстона ба Украинаро дорад.
Бояд гуфт, дар давоми чанд рӯзе, ки дар Украина амалиёти вижаи Русия мегузарад, кишварҳои мухталифи узви НАТО дар бораи кумаки низомӣ ба Украина мегӯянд. Барои мисол, ахиран Олмону Фаронса дар бораи интиқоли силоҳ барои кумак ба артиши Украина хабар доданд.