ДУШАНБЕ, 21 фев — Sputnik. Ҷузъиёти сӯхтори нуқтаи фурӯши сӯзишворӣ дар ноҳияи Қубодиён маълум шуд.
Бино бар иттилои Парвина Гулова, намояндаи Вазорати умури дохилаи Тоҷикистон, оташсӯзӣ рӯзи 21-уми феврал, соати 15:04-дақиқа дар нуқтаи фурӯши сӯзишвории ҶДММ "Ориё нафт", воқеъ дар кӯчаи Исмоили Сомонии ноҳияи Қубодиён сар задааст.
"Сабаби сӯхтор таркиши зарфи нигоҳдории гази моеъ мебошад", - шарҳ додааст Гулова.
Гуфта мешавад, барои хомӯш кардани ин сӯхтор ба ҷойи ҳодиса 6 мошини обпош ҳидоят шудааст. Масоҳати умумии сӯхтор тақрибан 280 метри мураббаъро ташкил додааст.
Манбаъ меафзояд, дар натиҷаи сӯхтор 13 нафар ҷароҳат бардоштанд, яъне сӯхтанд ва низ 7 мошин садама дидааст. Ҳамчунин 2 гов низ тайи ин оташсӯзӣ талаф шудааст.
Феълан аз тарафи коршиносон таҳқиқи ҳодиса идома дошта, сабаб, омил ва зарари пурраи он муайян карда мешавад.