ДУШАНБЕ, 10 янв — Sputnik. Вазъи коронавирус дар Ҷумҳурии Қирғизистон боз рӯ ба вахомат ниҳодааст. Сабти ҳолатҳои нави беморӣ қариб ҳамарӯза то 200 нафар афзоиш меёбад. Дар ҳоле ки қабл аз Соли Нав шабонарӯзӣ танҳо 50-60 нафар гирифтори коронавирус мешуд.
Гузашта аз ин вирус миёни кормандони Дастгоҳи президент низ доман паҳн намудааст.
Хабаргузории Sputnik Қирғизистон менависад, ки дар робита ба зиёд шудани ҳолатҳои нави гирифторӣ дар миёни кормандони ҳукумат, аз ҷумла намояндагони дастгоҳи президент ташхис мегузаронанд.
Гуфта мешавад, натиҷаи ташхиси нуҳ кормандони маъмурият ва дастгоҳ мусбат баромад ва ҳоло ҳамаи онҳо дар инзивоъ қарор доранд.
Ин хабар дар ҳолест, ки кишвардори Қирғизистон Содир Ҷабборов дар нишасти ғайринавбатии сарони кишварҳои СААД, ки рӯзи 10 январ дар шакли маҷозӣ баргузор шуд, ҳузур надошт. Сабаби дар ҷаласа иштирок накардани Ҷабборов ба мураххасӣ рафтани ӯ гуфта мешуд.
Маврид ба зикр аст, ки штамми нави коронавирус - омикрон аллакай вориди Ӯзбекистон шудааст. Ин вирусро хориҷие ба ҳамсоякишвар овардааст, ки аз Дубай аз тариқи ҳавопаймо вориди Ӯзбекистон шудааст.
Дар Тоҷикистону Қирғизистон ҳоло сабти ин навъи коронавирус таъйид нашудааст.