ДУШАНБЕ, 29 дек — Sputnik. Тибқи иттилои дафтари матбуотии шаҳрдории Хуҷанд, бахшида ба Соли Нави милодӣ 30-юми декабри соли равон дар тамоми муассисаҳои иҷтимоӣ маҳофили идона баргузор мешавад.
Тибқи иттилои манбаъ, ин гуна маҳфилҳо дар Маркази минтақавии хидматрасонии иҷтимоӣ ба пиронсолон ва маъюбон дар шаҳри Хуҷанд, Маркази дастгирии оила ва кӯдак, муассисаҳои махсуси томактабӣ, хона-парваришгоҳ барои шахсони бепаноҳмонда, Маркази солимгардонии норасоӣ ва ҳифзи кӯдакон баргузор мешаванд.
Манбаъ илова кардааст, ки бо ибтикори мақомоти шаҳри Хуҷанд дар муассисаҳои номбурда бо ҳузури намояндагони сарпарастҳои муайяншуда маҳфилҳои идона баргузор ва бошандагони ин муассисаҳои иҷтимоӣ ба аёдату ғамхорӣ фаро гирифта мешаванд.
Ҳамчунин манбаъ қайд кардааст, ки дар тамоми қисмҳои низомии ҳудуди шаҳри Хуҷанд чунин ҷашнҳо баргузор мешаванд.
Барои низомиён дар ин рӯз дастархони идона густурда мешавад.