ДУШАНБЕ, 23 дек — Sputnik. Шаби 22-юми декабри соли равон, тахминан соатҳои 22:00 хонаи сокини деҳаи Сомониёни Ҷамоати деҳоти Чоркӯҳи шаҳри Исфара Муҳаммадҷон Довудов мавриди тирпаронӣ қарор гирифт.
Вуқуи ин ҳодисаро Зубайдулло Шомадов, сухангӯи шаҳрдори Исфара дар суҳбат бо Sputnik Тоҷикистон таъйид кард.
Ба иттилои манбаъ, дар натиҷаи тирпаронӣ оинаҳои хонаи Муҳаммадҷон Довудов шикаста, тирҳо то ба ҷойи хоб ва деворҳои хона бархӯрдаанд.
"Хушбахтона, касе аз аҳли хонавода ҷароҳат набардоштааст ва ҳоло вазъ ором аст", - гуфт Шомадов.
Ба иттилои манбаъ, дар натиҷаи тирпаронӣ дару тирезаҳои хонаи истиқоматии Муҳаммадҷон Довудов шикаста, тир то ба деворҳои хона бархӯрдааст.
Тахминан ду ҳафта пештар низ якчанд гови ин сокини деҳаи Сомониён аз ҷониби қиргизҳо рабуда шуда буд ва танҳо баъди дахолати масъулин моли ӯ баргардонида шуд.
Инчунин дар муноқишаи моҳи апрели соли равон низ хонаи ин сокини Сомониён аз тарафи сокинони деҳаи Куктош оташ зада шуд, ки бо кумаки мақомоти иҷроия аз нав бунёд гардид.
Мавриди зикр аст, ки зуҳри 22-юми декабр низ дар дар сарҳади миёни ҷамоати Овчиқалъачаи ноҳияи Бобоҷон Ғафуров бо ноҳияи Лайлаки Қирғизистон тирпаронӣ рух дод.
Дар ҳамин ҳол КДАМ Қирғизистон марзбонони тоҷикро дар захмӣ кардани ронандаи "КамАЗ" айбдор мекунанд. КДАМ Тоҷикистон то ҳол тафсилоти ин ҳодисаро ироа накардааст.
Ёдрас менамоем, 17 декабр низ Кумитаи давлатии амнияти миллии Тоҷикистон вазъи ноором дар марзи Тоҷикисону Қирғизистонро шарҳ дода гуфта буд, дар деҳаи Сомониён сохтмони ғайриқонунӣ аз ҷониби шаҳрвандони Қирғизистон мунҷар ба муноқиша шудааст.
Бинобар нақли КДАМ, он гоҳ сардори дидбонгоҳи сарҳадии Қӯшунҳои сарҳадӣ ба хотири ҷилавгирӣ аз амалҳои зиддиҳуқуқӣ бо ҳамтои қирғизи худ вохӯрӣ барпо намуд, аммо зимни вохӯрӣ шаҳрвандони хашмгини Қирғизистон ба рафти он халал расонида, ба марзбонони тоҷик ҳамла карданд ва ба сӯйи онҳо санг партофтанд.
Тоҷикистону Қирғизистон беш аз 980 километр марзи муштарак доранд, ки танҳо 520 километри он аломатгузорӣ шудааст. Номуайянӣ дар марз то ин вақт борҳо сабаби муноқиша шудааст.