ДУШАНБЕ, 21 дек – Sputnik. Туркия маҳдудиятҳои раводид барои шаҳрвандони Тоҷикистонро лағв мекунад, гуфт Мустафо Варанк, вазири саноат ва технологияи Туркия дар ҳамоиши дуҷонибаи доираҳои тиҷоратӣ дар шаҳри Кония.
Ба гуфтаи Варанк, маҳдудиятҳо дар моҳи январи соли 2022 лағв хоҳанд шуд.
Дар ҳоли ҳозир бо шиносномаи хориҷӣ ва бидуни раводид метавон дар Туркия то 30 рӯз, бо шиносномаи расмӣ то 60 рӯз ва бо шиносномаи дипломатӣ то 90 рӯз монд.
Ин иқдом, ба гуфтаи вазир, ҳамкориҳои муштарак дар бахшҳои маориф ва гардишгарӣ равобити таърихиву фарҳангиро ба таври амиқ тавсеа диҳад.
Вай таъкид кард, ки ба далели иқдомоти мутақобил дар заминаи молиёт, логистика ва низоми бидуни раводид имкон пайдо мешавад, ки гардиши мол миёни Туркия ва Тоҷикистон ба 1 миллиард доллар афзоиш ёбад.
Дар 10 моҳи соли 2021 ҳаҷми муомилоти молии Туркия ва Тоҷикистон ба 362 миллион доллар расидааст.
Қаблан мақомоти Тоҷикистон гуфта буданд, ки аз 1 январи соли 2022 барои шаҳрвандони 52 давлат низоми якҷонибаи бидуни раводид ҷорӣ мекунанд. Туркия дар рӯйхати ин кишварҳо қарор дорад.
Ба шаҳрвандони хориҷӣ иҷозат дода мешавад, ки дар қаламрави ҷумҳурӣ 30 рӯз иқомат кунанд ва пас аз он раводид гирифтанашон лозим аст.
Ёдовар мешавем, шаҳрвандони беш аз 20 кишвари ҷаҳон, аз ҷумла Русия, бар асоси қарордодҳо дар бораи низоми бидуни раводид, барои сафар ба Тоҷикистон ба виза ниёз надоранд.