Боздиди раҳбари Роспотребнадзор аз озмоишгоҳҳои Душанбе - акс

ДУШАНБЕ, 18 дек — Sputnik. Дар доираи сафари корӣ ба Тоҷикистон роҳбари Хадамоти федералии ҳифзи ҳуқуқи истеъмолкунандагон ва беҳдории инсон (Роспотребнадзор)-и Анна Попова аз озмоишгоҳҳои Душанбе боздид кард.

Дар ин бора хадамоти матбуотии Вазорати тандурустии Тоҷикистон хабар медиҳад.

Гуфта мешавад, ки Анна Попова аз Озмоишгоҳи миллии референсӣ ва Озмоишгоҳи миллии тандурустии ҷамъиятӣ дидан карда бо фаъолияти онҳо ошно шудааст.

Манбаъ иттилоъ медиҳад, ки озмоишгоҳҳои мазкур бо навтарин таҷҳизоти муосир таъмин мебошанд.

Ҳамчунин гуфта мешавад, ки дар Озмоишгоҳи миллии референсӣ ва Озмоишгоҳи миллии тандурустии ҷамъиятӣ, ташхисҳои гуногун бо сифати баланд гузаронида мешаванд.

Ёдрас мешавем, ки раҳбари Хадамоти федералии ҳифзи ҳуқуқи истеъмолкунандагон ва беҳдории инсон (Роспотребнадзор) Анна Попова ofvxeyby бо сарвазири Тоҷикистон Қоҳир Расулзода ва вазири тандурустӣ Ҷамолиддин Абдуллозода дидору мулоқот кард.

Бояд гуфт, наздик ба як моҳ мешавад, ки дар Тоҷикистон ягон ҳолати нави гирифторӣ ба коронавирус қайд нашудааст.

Дар маҷмуъ, аз оғози ҳамагирӣ то кунун дар кишвар 17095 нафар гирифтори коронавирус ба қайд гирифта шуда, аз ин шумора 16966 шифо ёфта ва 124 нафар бар асари ин беморӣ фавтидааст.

Феълан ҷаҳон аз паҳншавии штамми нави коронавирус - омикрон дар изтироб аст. Ба гуфти коршиносон ин навъи вирус нисбат ба штамми делта 70 баробар зудтар паҳн мешавад.

Вазорати тандурустии Тоҷикистон, то ҳол аз роҳ ёфтани штамми омикрон ба Тоҷикистон хабар надодаанд.

Омикрон ҳамакнун дар беш аз 60 кишвари ҷаҳон паҳн шудааст ва инро Созмони Ҷаҳонии Беҳдошт боиси нигаронии зиёд медонад.

Раҳбари ситоди муқобила бо коронавирус дар Тоҷикистон Қоҳир Расулзода дар ин росто нишаст баргузор кард ва ба масъулини соҳа барои пешгирии паҳншавии омикрон дар Тоҷикистон супоришҳо дод.

Расулзода таъкид кард, ки танҳо бо роҳи гузаронидани ваксина ва риояи тавсияи мутахассисони соҳи тиб имкони пешгирии бемориҳои сироятӣ вуҷуд дорад.