ДУШАНБЕ, 16 дек — Sputnik. Ҳавошиносони аврупоӣ сардтарин зимистонро дар 30 соли охир барои Русия пешгӯӣ карданд.
Коршиносони Маркази ҳавосанҷии аврупоӣ бар ин назаранд, ки дар шароити муайян дар Маскав ҳаво то 50 дараҷа сард мешавад.
Коршиносони аврупоӣ бар ин назаранд, ки зимистони оянда дар Русия ба яке аз шадидтарин зимистонҳои 30 соли охир табдил хоҳад ёфт.
Ҳавошиносон чунин хулосаҳоро бо афзоиши басомади аномалияҳои табиӣ дар рӯи замин алоқаманд мекунанд - онҳо дар тӯли ним асри охир панҷ баробар бештар шудаанд.
Коршиносони иқлим ва обуҳаво мушаххас кардаанд, ки бо гармтар шудани сайёра, падидаҳо ҳамон қадар шадидтар ва харобиовар мешаванд. Сабаби сармои пешгӯишаванда дар хусусиятҳои хоси сиклонҳое, ки ба қаламрави Русия меонд, будааст.
Дар ҳамин ҳол, коршиносони "Фобос" бар ин назаранд, ки зимистони оянда дар маркази Русия шояд гармтарин дар таърихи мушоҳидаҳои метеорологӣ шавад.
Тибқи пешгӯии тахминӣ ҳарорати миёнаи ҳаво дар фасли зимистон аз меъёр беш аз чор дараҷа бештар мешавад.
Мутахассиси Ожонсии ҳавошиносии Маскав низ гуфтааст, ки дар авоили ҳафтаи оянда ҳарорати ҳаво дар Маскав поин меравад. Сардии ҳаво то -20 дараҷа мешавад.