ДУШАНБЕ, 3 дек – Sputnik. Афроди муовини волусволи толибҳо ва қумандони амнияти ин гурӯҳ дар волусволии Чоҳи Оби вилояти Тахор ба як тӯйи хонадоршавии бошандаи маҳаллӣ ҳамла кардаанд, хабар дод Sputnik Афғонистон бо такя ба шоҳидони айнӣ.
Ба иттилои манбаъ, ҳамлагарон дастгоҳҳои мусиқиро шикаста, чандин нафарро латукӯб кардаанду ба ҳаво низ тир холӣ намудаанд. Таъкид шудааст, ки ҳуҷум шаби 2 ба 3 декабр рух дода, миёни ҷароҳатбардоштагон хонумон низ мебошанд. Феълан маҷрӯҳон дар беморхона бистарӣ мебошанд.
То ҳол толибҳо дар бораи ин ҳодиса ҳанӯз изҳори назар накардаанд.
Ин дар ҳолест, ки пеш аз ин низ дар пайи ҳамлаи толибҳо ба як ҷашни арӯсӣ дар вилояти Нангарҳори Афғонистон дастикам ду нафар кушта ва 10 тани дигар захм бардошта буданд.
Инчунин моҳи ноябр як ҷавони 19-солаеро низ дар деҳаи Заргарони ноҳияи Ишкошими вилояти Бадахшон барои гӯш кардани мусиқӣ шадидан латукӯб карданд, ки баъдан ҷабрдида дар роҳ ба беморхона ба ҳалокат расид, хабар дод рӯзномаи "Ҳашти субҳ"-и Афғонистон.
Ба иттилои манбаъ, ҷавони кушташуда Воҳидуллоҳ ном дошту ҳангоми гӯш кардани мусиқӣ бо телефони ҳамроҳ аз сӯйи толибҳо кушта шуд.
Бар асоси хабарҳои расида аз вилоёти Афғонистон, толибҳо гӯш ва навохтани мусиқиро мамнуъ эълон карда, афродеро, ки мусиқӣ гӯш мекунанд ё менавозанд, мавриди таъқиб қарор медиҳанд.