ДУШАНБЕ, 30 ноя — Sputnik. Президенти Тоҷикистон Эмомалӣ Раҳмон ба Қонун "Дар бораи буҷаи давлатии Ҷумҳурии Тоҷикистон барои соли 2022" имзо гузошт, - хабар медиҳад хадамоти матбуотии кишвардор.
Дар буҷаи давлатӣ ба соҳаҳои иҷтимоӣ бартарӣ дода шуда, ба ин бахшҳо қариб нисфи маблағ ихтисос ёфтааст.
"Чунин бартарӣ ба соҳаҳои иҷтимоӣ аз моҳияти иҷтимоии сиёсати президент сарчашма гирифта, ба ҳифзи ҳамаҷонибаи иҷтимоии халқи кишвар ва беҳдошти зиндагии онҳо равона шудааст", - омадааст дар хабар.
Ҳаҷми буҷаи давлатии кишвар барои соли 2022 33 миллиард сомонӣ муқаррар шудааст.
Ҳамин тавр дар буҷаи соли 2022 ҳам хусусияти иҷтимоии он нигоҳ дошта шуда, 14,7 млрд сомонӣ ҷудо шудааст, ки 43,8 дарсади буҷаро дар бар мегирад.
Аз ин ҳисоб барои маблағгузории соҳаи маориф 6,3 млрд, тандурустӣ 2,9, суғуртаи иҷтимоӣ ва ҳифзи иҷтимоӣ 4,3 ва фарҳангу варзиш 1,2 млрд сомонӣ бояд масраф шавад.
Бояд тазаккур дод, ки матни Қонуни Ҷумҳурии Тоҷикистон "Дар бораи буҷаи давлатии Ҷумҳурии Тоҷикистон барои соли 2022" дар матбуот нашр мешавад.