ДУШАНБЕ, 19 ноя — Sputnik. Муассисаи таълимии хусусии “Ҳоризон”-ро соҳибкорон Зоир Боқиев ва Наврӯз Юнусов бунёд карданд, хабар додааст дафтари матбуотии раисҷумҳури Тоҷикистон.
Ба иттилои манбаъ, корҳои сохтмонӣ дар ду марҳила сурат мегирад ва феълан навбати аввали он мавриди баҳрабардорӣ қарор гирифт.
"Бино аз 4 ошёна ва таҳхона иборат буда, дар масоҳати 900 метри мураббаъ доман густурдааст ва барои зинаи “Ахтарон”, яъне таҳсили 384 нафар хонандаи синфҳои аз 1 то 4 пешбинӣ шудааст", - омадааст дар иттилоия.
Таъкид гард, ки таълим дар муассиса пурра бо забони англисӣ ва аз тариқи низоми "Steam education" бо ҷалби муаллимони ҷавон аз дохилу хориҷ роҳандозӣ шудааст.
Эмомалӣ Раҳмон ҳиммати ҷавонмардонаи соҳибкоронро дар рушди соҳаи маориф ва ободонии диёр намунаи ибрат хондааст.
Соҳибкорон уҳдадор шуданд, ки дар давоми ду соли оянда марҳилаи дуюми сохтмони бинои асосии таълимгоҳ барои 1280 нафар хонандаро ба анҷом мерасонанд.
Дар пайи анҷоми марҳилаи дуюм хонандагони аз синфи 1 то 11 ба таълим фаро гирифта мешаванд.