ДУШАНБЕ, 26 окт — Sputnik. Антониу Гутерриш, дабири кулли СММ ҳушдор дод, ки Афғонистон ба бузургтарин бӯҳрони башардӯстона дар ҷаҳон табдил мешавад.
Гутерриш дар ин бора имрӯз 26 октябр дар сафҳаи Твитераш навишт, ки бӯҳрон наздик аст.
Ӯ таъкид кард, ки Созмони Милали Муттаҳид барои ироаи кумакҳои башардӯстона ба мардуми Афғонистон дар зимистони оянда ва қонеъ кардани ниёзҳои аслии онҳо бо мурури замон ёрӣ мекунад.
Номбурда аз ҷомеаи ҷаҳонӣ даъват кард, ки барои маблағгузории талошҳои СММ барои дастгирии табақаҳои осебпазир дар Афғонистон иқдом кунанд.
Дабири кулли СММ ҳушдор додааст, ки Афғонистон ба бадтарин фалокати башарӣ дар ҷаҳон табдил мешавад. Кишвар дар зимистони оянда ба гуруснагӣ мувоҷеҳ хоҳад шуд.
Дар Афғонистон ҳанӯз пеш аз ба қудрат расидани "Толибон"*, ҳудуди 18 миллион нафар ба кумакҳои башардӯстона ниёз доштанд, аммо ин ниёзҳо дар ду моҳи гузашта аз замони ба дасти ҷангиён расидани давлат бештар шудааст.