ДУШАНБЕ, 15 окт — Sputnik. Хадамоти иктишофии кишварҳои Созмони Ҳамкории Шанхай (СҲШ) робитаҳоро дар пасманзари вазъ дар Афғонистон тақвият додааст, хабар медиҳад РИА "Новости" бо истинод ба хадамоти матбуотии Сохтори минтақаии зиддитеррористии СҲШ.
Хадамоти махсус ба табодули иттилоот дар бораи муқовимат бо терроризми Афғонистон шуруъ кард.
Ҳамин тариқ дар қароргоҳи Кумитаи иҷроияи Сохтори минтақаии зиддитеррористии СҲШ дар Тошканд ҷаласаи сарони воҳидҳои зиддитеррористии мақомоти салоҳиятдори кишварҳои узви ин созмон баргузор шуд.
"Роҳбарони ҳайатҳо ба чолишҳо ва таҳдидҳо ба амнияти кишварҳои узви Созмони Ҳамкории Шанхай дар заминаи вазъ дар Афғонистон баҳо дода, дар робита ба масъалаҳои мубрами мубориза бо терроризм, ҷудоихоҳӣ ва ифротгароӣ табодули назар карданд", - омадааст дар хабар.
Илова бар ин иштирокчиён пешниҳодҳои марбути тақвияти ҳамкорӣ дар ин самт байни мақомоти салоҳиятдори СҲШ-ро баррасӣ кардаанд.
Ёдовар мешавем, ки қаблан намояндаи Ӯзбакистон дар Созмони Ҳамкории Шанхай Раҳматулло Нуримбетов гуфта буд, ки соли оянда тақвияти ҳамкориҳои кишварҳои узв дар мубориза алайҳи терроризм муҳим хоҳад буд.
СҲШ соли 2001 таъсис ёфта, Ҳиндустон, Қазоқистон, Чин, Қирғизистон, Русия, Тоҷикистон, Эрон, Покистон ва Ӯзбекистонро шомил мешавад.
Кишварҳои нозир Афғонистон, Беларус, Эрон ва Муғулистон, кишварҳои шарик Арманистон, Озарбойҷон, Камбоҷа, Непал, Туркия ва Шри-Ланка мебошанд.