ДУШАНБЕ, 12 окт — Sputnik. Аъзоёни гурӯҳи радикалии "Толибон"* ният доранд, Афғонистонро ба "чорроҳаи иқтисоди ҷаҳонӣ" табдил диҳанд. Дар ин бора Амирхон Муттақӣ, вазири корҳои хориҷӣ ки аз ҷониби ҷангиён таъин шудааст, дар мусоҳиба бо шабакаи телевизионии Tolo news хабар додааст.
Вай қайд кардааст, ки ҷангиён мехоҳанд Афғонистонро як давлате созанд, ки ҳам ба талаботи шаҳрвандон ва ҳам ба стандартҳои байналмилалӣ ҷавобгӯ бошад.
Ба гуфти Муттақӣ, ҷангҷӯён ният доранд, аз имконоти мавқеи ҷуғрофии кишвар ба пуррагӣ истифода баранд. Ҳамзамон, намояндаи радикалҳо бори дигар аз давлатҳои дигар даъват кард, ки ба сиёсати Афғонистон дахолат накунанд.
"Мо ба корҳои дохилии ягон кишвари дигар дахолат намекунем ва аз онҳо низ ҳамин чизро интизор ҳастем", - таъкид кард ӯ.
Муттақӣ аз фишори ҷомеаи ҷаҳонӣ изҳори таассуф кард. Вай ишора кард, ки "ҳукумати пешин дар давоми 20 сол натавонист ислоҳот анҷом диҳад ва "Толибон"* вазифадоранд, онро дар ду моҳ анҷом диҳанд".
Сухангӯи ҷангиён гуфт, ки Толибон бо ҷаҳони берунӣ "як саҳифаи наверо боз карданд" ва ҳамчунин "паёми равобити хуб фиристоданд".
* - созмони террористӣ, ки фаъолияташ дар Русия ва Тоҷикистон мамнуъ аст.