ДУШАНБЕ, 12 окт — Sputnik. Таҷрибаи ҷангии Сурия асоси амали низомиёни рус дар машқҳои вижаи кишварҳои СПАД дар Тоҷикистон "Эшелон-2021" хоҳад буд, хабар медиҳад дафтари матбуотии Ҳавзаи марказии ҳарбии Вазорати дифои Русия.
Ёдовар мешавем, ки машқҳои низомӣ бо нерӯ ва васоили таъмини моддию техникии нерӯҳои Созмони Паймони Амнияти Дастаҷамъӣ бори аввал дар қаламрави Тоҷикистон аз 18 то 23 октябр баргузор мешаванд.
"Ҳангоми машқ мо бо таваҷҷуҳ ба таҷрибаи муноқишаҳои мусаллаҳи муосир, аз ҷумла дар Ҷумҳурии Сурия ва Қарабоғи Кӯҳӣ вазифаҳои васеи таъминоти моддию техникии қувваҳои вокуниши сареи СПАД-ро пардозиш хоҳем дод", - гуфт муовини фармондеҳи бахши таъминоти Ҳавзаи марказии ҳарбӣ генерал-лейтенант Алексей Лемякин.
Ҳамин тариқ воҳидҳо вазифаҳои омӯзишии ҷангиро барои густариши иншооти инфрасохтори анбор, истгоҳҳои саҳроӣ барои гирифти сӯзишвории таҷҳизот иҷро мекунанд. Қарор аст, омӯзиши кӯчонидани мошинҳои зиреҳпӯши вайроншуда аз майдони ҷанг, таҳвили мавод ва муҳимоти ҷангӣ низ сурат бигирад.
Гуфта мешавад, беш аз 500 низомии воҳидҳои таъминоти моддию техникии қувваҳои мусаллаҳи Беларус, Қазоқистон, Русия ва Тоҷикистон ба вазифаҳои амалӣ ҷалб карда мешаванд.
Лемякин афзуд, ки машқ омӯзиш ва ҳамоҳангӣ иҷрои вазифаҳои муштараки воҳидҳои таъминоти моддию техникии қувваҳои мусаллаҳи кишварҳои узви СПАД-ро беҳтар хоҳад кард.