ДУШАНБЕ, 2 окт — Sputnik. Тоҷикистон фурӯши нерӯи барқ ба Қирғизистонро оғоз кард. Барқрасонӣ аз 1 октябр оғоз шудааст. Дар ин бора вазири энержӣ ва саноати Қирғизистон Доскул Бекмурзаев ба хабарнигорон гуфтааст.
Ба гуфтаи ӯ, ҷониби Тоҷикистон дар робита ба зиёдатии барқ пешниҳоди содирот кардааст. Ҳоло Қирғизистон аз кишвари ҳамсоя миллион киловатт-соат нерӯи барқ мехарад.
"Мо дар бораи мубодила гуфтушунид намекунем, Қирғизистон мехарад. Тафсилоти созишномаи таъминот дар ҳоли баррасӣ қарор дорад. Аз имрӯз интиқол ба минтақаҳои ҷанубии ҷумҳурӣ оғоз шуд", - гуфт Бекмурзаев.
Вай афзуд, ки Қирғизистон масъалаи воридоти барқ аз Русияро баррасӣ мекунад.
Ёдовар мешавем, ки ҳанӯз дар зимистони соли 2021 Тоҷикистон мушкили норасоии барқро дошт. Дар кишвар барои истифодаи барқ маҳдудият ҷорӣ карда шуд ва баъзе минтақаҳо рӯзона бе барқ монданд.
Мақомоти кишвар чунин чораҳоро бо кам шудани об дар обанбори Норак шарҳ доданд.
Илова бар ин, бинобар омадани ҳавои сард, сокинони ҷумҳурӣ ба истифодаи бештари нерӯи барқ шурӯъ карданд. Набудани захираҳо ба пурзӯр шудани назорат аз болои истифодаи онҳо мусоидат намуд.
Ҳамин тариқ, дар Тоҷикистон комиссияҳои махсус ташкил карда шуд, ки дар бораи истифодаи оқилонаи нерӯи барқ бо сокинон сӯҳбатҳои фаҳмондадиҳӣ гузарониданд ва қонуншиканоне, ки аз ҳисобкунак дурӣ меҷустанд, муайян ва ҷарима шуданд.