ДУШАНБЕ, 28 сен — Sputnik. Зани ҷавоҳирфурӯше ба идораи милиса дар ноҳияи Фирдавсӣ муроҷиат карда, аз мавриди дуздӣ дар мағозааш шикоят кардааст.
Ба иттилои ВУД, муроҷиаткунанда, сокини 34-солаи пойтахт арз доштааст, ки рӯзи 20-уми сентябри соли 2021, тахминан соати 13:30-дақиқа шахсони номаълум бо роҳи пинҳонӣ аз дохили мағозаи тилловориаш, воқеъ дар бозори "Корвон", як ҷуфт гушвори тиллоиро дуздида, ғайб задаанд.
Манбаъ арзиши гӯшворҳои дуздидашударо 5 ҳазор сомонӣ арзёбӣ кардааст.
Мақомоти умури дохилӣ мегӯянд, дар пайи гузаронидани чорабиниҳои оперативӣ-ҷустуҷӯӣ зани 36-солаи сокини ноҳияи Восеъ бо гумони содир намудани ҷинояти дуздӣ дастгир шудааст.
Вазорати умури дохилии Тоҷикистон афзуд, ки тафтиши ин ҳодиса идома дорад.