ДУШАНБЕ, 18 авг — Sputnik. Дар Тоҷикистон заминларзаи 4,1 - баллӣ рух дод, хабар медиҳад Маркази зилзиласанҷии Вазорати ҳолатҳои фавқулоддаи Ӯзбекистон.
Заминларза 18 август соати 13:52 ба вақти маҳаллӣ сабт шудааст.
Маркази заминҷунбӣ дар қаъри 15 километр дар зери замин ҷойгир будааст.
Кумитаи ҳолатҳои фавқулоддаи Тоҷикистон то ҳол ҷузъиёти ин заминларзаро шарҳ надодааст: дар бораи талафот ва харобиҳо гузориш нашудааст.
Дар ҳамин ҳол, маълум аст, ки заминларза дар ҳудуди Ӯзбекистон эҳсос нашудааст.
Ёдовар мешавем, ки охирин заминларзаи харобиовари 6-баллӣ дар Тоҷикистон 10 июли 2021 рух дода буд. Ин заминларза 165 - километр шимолу шарқи Душанбе ва 21 километр дуртар аз Рашт ва Тоҷикобод рух дод.
Дар паи ин ҳодисот, панҷ сокини деҳаи Бӯстон қурбон шуданд, ҳафт нафари дигар, ки дар миёни онҳо чаҳор кӯдак буданд, пас аз заминларза дар бемористон бистарӣ шуданд, даҳҳо хона хароб гардиданд.