ДУШАНБЕ, 14 авг – Sputnik.Вазорати тандурустӣ ва ҳифзи иҷтимоии аҳолии Тоҷикистон омори ҷадиди сироят ва шифоёбӣ аз вируси коронаро эълон кард.
Тибқи иттилои ин ниҳод шабонарӯзи охир дар ҷумҳурӣ 67 ҳолати ҷадиди гирифторӣ ба COVID - 19 ба қайд гирифта шудааст.
Бар асоси омори нашркардаи ин ниҳод, шумораи гирифторшудаҳо дар қиёс бо теъдоди табобатёфтаҳо дар як шабонарӯз камтар мебошад.
Таъкид шудааст, ки дар як шабонарӯзи гузашта 84 нафар шифо ёфтаанд.
Мақомоти тандурустии Тоҷикистон таъкид намуданд, ки дар шабонарӯз ягон ҳолати фавт аз коронавирус ба қайд гирифта нашудааст.
Охирин ҳолати марг аз коронавирус расман дар ҷумҳурӣ 10 август сабт шуда, дар маҷмуъ теъдоди фавтидагон аз ин маризӣ 123 нафар арзёбӣ шудааст.
Тибқи омори расмӣ, аз аввали хуруҷи коронавирус дар ҷумҳурӣ то 13 август маҷмӯан 15 ҳазору 997 сироятшуда сабт гардидаанд.
Аз ин 15 ҳазору 593 нафар шифо ёфтаанд. Аз ин омор бармеояд, ки феълан дар ҷумҳурӣ 281 нафар гирифтори коронавирусанд.