ДУШАНБЕ, 13 авг – Sputnik. КҲФ мегӯяд, хабари дармондани ноболиғон дар лифтро 12 августи соли 2021 соати 18:19 дақиқа гирифтааст.
Муроҷиаткунандагон ба қисми навбатдории КҲФ изҳор доштаанд, ки дар бинои рақами 12 дар кӯчаи Нусратулло Махсум лифт вайрон шудаву дар он 5 нафар ноболиғон руст мондаанд.
Манбаъ афзуд, ки бегоҳӣ баъди сайругашт дар кӯча ин ноболиғон вориди лифт шудаанд ва лифт ба ҳаракат даромадаву дар байни ошёнаҳо аз кор мондааст.
"Онҳо муддати қариб як соат дар дохили лифт мондаанд. Ҳеч кумаке аз ҷойе нарасидааст. Талош кардаанд ба хадамоти садамавӣ занг зананд, аммо мутаассифона дар ҳама талошҳояшон ноком мондаанд. На хадамоти садамавию на диспетчер ба додашон нарасиданд”, - нақл кардаанд онҳо ба имдодгарон.
Ба иттилои КҲФ дар пайи дарёфти иттилоъ, имдодгарон тайи 15 дақиқа бо истифода аз таҷҳизоти махсуси гидравликии садамавиву наҷот дари лифтро боз карда, ноболиғонро берун оварданд.
Ин ниҳод таъкид намуд, ки касе аз ин наврасон ба ёрии тиббӣ ниёз надошт.