ДУШАНБЕ, 9 авг – Sputnik. Ҳамалоти ҷангҷӯёни гурӯҳи Толибон* ба маркази Сарипул чанд рӯз аст, ки давом дошт ва ахиран контроли ин шаҳр комилан ба дасти Толибон* уфтод, иттилоъ додааст Sputnik Афғонистон.
"Нерӯҳои амниятии Афғонистон ба як пойгоҳи низомии берун аз шаҳр интиқол дода шуданд. Дар наздикии пойгоҳ задухӯрдҳо идома доранд", - иттилоъ додааст манбаъ.
Амруддин Валӣ, узви Шӯрои вилоятии Кундуз, низ гуфт, ки даргириҳо байни нерӯҳои амниятӣ ва ҷангҷӯёни Толибон* ду рӯз боз идома доранд ва ҳоло ҷангҷӯёни Толиб* Кундузро таҳти назорати худ гирифтаанд.
Вай гуфт, ки нерӯҳои амниятӣ ва мақомоти маҳаллӣ ба фурудгоҳи Қундуз ақибнишинӣ кардаанд ва дар ҷараёни даргириҳо бархе аз дӯконҳо ва мағозаҳо дар маркази шаҳр оташ гирифтаанд.
Толибон ба тасарруфи вилоятҳои Қундуз ва Сарипул ишора карданд.
Ба гуфтаи шоҳидони айни замон, ҷангҷӯёни Толиб* маҳбусонро пас аз забти Қундуз раҳо кардаанд.
Пас аз авҷ гирифтани хушунатҳо дар Афғонистон, сафоратхонаҳои Амрико ва Бритониё дар Кобул аз шаҳрвандони худ дар Афғонистон даъват карданд, ки ҳарчӣ зудтар ин кишварро тарк кунанд.
* - созмони террористӣ, ки фаъолияташ дар Русия, Тоҷикистон ва як қатор кишварҳои дигар мамнӯъ аст