ДУШАНБЕ, 6 авг – Sputnik. Саидиброҳими Раисӣ раисҷумҳури тозаинтихоби Эрон дар дидор бо Маҳмадтоир Зокирзода, раиси Маҷлиси намояндагони Тоҷикистон, асоси равобити ду кишварро ҳамдилӣ ва ҳамзабонӣ донист ва бар густариши равобити ду кишвар таъкид кард, иттилоъ додааст хабаргузории ИРНА.
Раисҷумҳури тозаинтихоби Эрон ба раиси Маҷлиси намояндагони Тоҷикистон гуфт, ки равобити Теҳрону Душанбе фаротар аз равобити оддии ду кишвар бо якдигар аст ва бояд бо эътимод ба наздикиҳои фарҳангӣ ва тамаддунӣ, барои рушди сатҳи ин равобит қадамҳои ҷиддие гузошт.
Саидиброҳими Раисӣ тавсеаи равобити Эрон, Тоҷикистон ва Афғонистон ба унвони се кишвари форсизабонро дорои аҳаммияти фаровон унвон кард.
“Ноамниҳои имрӯзи Афғонистон, ки реша дар дахолатҳои бегонагон дар ин кишвар дорад, ба нафъи ҳечкас нест ва Эрону Тоҷикистон бояд барои рафъи ин нигаронии муштарак дар арсаи дуҷониба ва байналмилалӣ ҳамкориҳои наздиктаре бо якдигар дошта бошанд”.
Ҳамзамон манбаъ қайд кардааст, ки ҷаноби Зокирзода дар навбати хуб ба раисиҷумҳури тозаинтихоби Эрон салому эҳтироми Эмомалӣ Раҳмон роҳбари Тоҷикистонро расонд.
Зокирзода зимни дидор қайд кард, ки пайвандҳои ногусастании таърихию фарҳангӣ ду кишварро водор месозанд, ки ба ҳамкории судманд ҳарчи бештар рушду густариш диҳем.