ДУШАНБЕ, 28 июл - Sputnik. Оқохони IV - Шоҳ Карим ал Ҳусайнӣ, пешвои исмоилиёни ҷаҳон дар робита ба даргузашти хушдоман ва хоҳари президенти Тоҷикистон изҳори ҳамдардӣ кард, хабар медиҳад хадамоти матбуотии президенти Тоҷикистон.
Ӯ дар барқияи таслияташ ба президенти Тоҷикистон ва аҳли хонаводаашон сабри ҷамил хостааст.
"Ман ба Шумо ҳамдардии самимии хешро нисбати даргузашти хушдоман ва хоҳари маҳбубатон иброз медорам. Бигзор руҳи рафтагон дар осоиштагии абадӣ бошад ва Худованди Карим ба Шумо ва аҳли оилаатон сабри ҷамил ва ирода барои тоб овардани ин талафоти ҷуброннопазир ато намояд".
Оқохони IV гуфтааст, ки дар ин рӯзҳои хеле ғамангез дуогӯ ва ғамшарики Эмомалӣ Раҳмон аст.
Ҳамчунин, дар робита ба даргузашти Қурбонбӣ Раҳмонова – хоҳари президенти Тоҷикистон аз сарони як қатор давлатҳо ва ҳукуматҳои хориҷӣ номаҳои изҳори тасаллӣ ворид гардидаанд.
Ҳамин тавр, президенти Озарбойҷон Илҳом Алиев, ходими Ҳарамайни Шарифайн Подшоҳи Шоҳигарии Арабистони Саудӣ Салмон ибни Абдулазиз Оли Сауд ва президенти Қирғизистон Содир Ҷабборов ҳам, бо кишвардори Тоҷикистон ҳамдардӣ кардаанд.
Қурбонбӣ Раҳмонова рӯзи 20-уми июл рӯзи Иди Қурбон дар синни 64 – солагӣ даргузашт. Ҳукумати кишвар ба Президенти Тоҷикистон, фарзандон, хешовандон ва дӯстони Раҳмонова изҳори тасаллият кард. Сабабҳои марг зикр нашудаанд, аммо бар асоси гузоришҳо, иллати марг коронавирус мебошад.
Қурбонбӣ Раҳмонова, ҳамсари Холмӯъмин Сафаров, собиқи раиси корхонаи давлатии "Хоҷагии ҷангал ва шикор" мебошад, ки соли 2012 дар шаҳри Душанбе кушта шуд.