ДУШАНБЕ, 25 июл – Sputnik. Ҷунбиши "Толибон"* ба ҷомеаи ҷаҳонӣ ва ташкилотҳои ғайритиҷоратӣ муроҷиат кардааст, ки дар мубориза бо паҳншавии коронавирус дар Афғонистон кумак кунанд.
Дар ин бора намояндаи дафтари сиёсии "Толибон"* дар Қатар Сӯҳайл Шоҳин ба РИА Новости хабар додааст.
"Феълан мо тамоми манотиқи рустоии Афғонистонро таҳти назорат дорем, ниёз ба кумаки тиббӣ вуҷуд дорад. Мо аз тамоми кишварҳои ҷаҳон, созмонҳои ғайриҳукуматӣ даъват мекунем, ки дар мубориза бо пандемияи коронавирус кумакамон кунанд", - гуфт ӯ.
Сухангӯи "Толибон"* инчунин гуфт, ки дар ин минтақаҳо доруҳо ва дастгоҳҳои нафасдиҳии сунъӣ намерасад.
"Комиссия хабар дод, ки онҳо барои огоҳ кардани аҳолӣ тамоми чораҳоро меандешанд, аммо доруҳо ва ваксинаҳои зарурӣ барои мубориза бо сирояти паҳншударо надоранд", - афзуд Шоҳин.
Бояд қайд кард, ки ҷомеаи ҷаҳонӣ ҳукмронии "Толибон"*-ро дар минтақаҳои забтшуда эътироф намекунад.
Дар музокироти ахири Кобул ва ҳайати "Толибон"*, дар бораи таъмини амнияти табибони давлатӣ, ки бо ваксингузаронӣ машғуланд, созиш ҳосил шуд.
Ёдрас мешавем, ки котиби давлатии ИМА Энтони Блинкен рӯзи ҷумъа дар мусоҳиба бо шабакаи телевизионии MSNBC гуфт, ки агар "Толибон"* қудратро дар кишвар бо зӯрӣ ба даст оранд, дастгирии байналмилалӣ нахоҳанд гирифт.
Эзоҳ: Толибон* - ташкилоти террористие, ки фаъолияташ дар Русия, Тоҷикистон ва як қатор кишварҳои дигар манъ карда шудааст.