ДУШАНБЕ, 20 июл — Sputnik. Яке аз аломатҳои хатарнок пас аз эмкунӣ алайҳи коронавирус, ҳарорати аз 40 дараҷа боло мебошад.
Дар ин бора Олга Ткачёва, сардухтури гериатри Вазорати тандурустии Русия дар мусоҳиба бо URA.RU гуфт.
Агар таби баланд беш аз ду рӯз идома ёбад, фавран ба духтур муроҷиат кардан лозим аст, мегӯяд мутахассис.
Ба гуфти вай, чунин падида нишонаи гирифторӣ ба сирояти коронавирус аст, ки ё қабл аз эмгузаронӣ ва ё пас аз он, замоне, ки масуният ҳанӯз ташаккул наёфтааст, рух додааст.
Ҳамчунин агар пас аз эмгузаронӣ нафаскашии шумо вазнин шавад ва ё тапиши дилатон зиёд гардад, бояд ба ёрии тиббӣ муроҷиат кунед.
Ткачёва гуфт, ки нороҳатӣ дар ҷои тазриқ метавонад аз илтиҳоб дарак диҳад.
Қаблан низ табибони рус сабаби дарди шадиди дастро ҳангоми гузаронидани ваксинаи коронавирус шарҳ дода буданд.
Нороҳатӣ дар ҷои тазриқро аксари эмшудаҳо тасдиқ мекунанд. Ба гуфти табибон, аксуламали пӯст ва мушакҳо аз ҳисоби ҷамъшавии дору дар ҷои тазриқ ба амал меояд.
Барои паҳн шудани ваксина дар тамоми бадан вақт лозим аст.
Ғайр аз ин, ҳангоми гузаронидани сӯзандору, табиб метавонад нӯги асабҳоро халалдор кунад. Дар чунин маврид низ эҳсосоти дарднок ба вуҷуд меояд.