ДУШАНБЕ, 16 июля — Sputnik. Бино бар иттилои дафтари матбуоти мақомоти шаҳри Хуҷанд, ахиран корҳои безараргардонӣ дар шаҳр бо дастуру супоришҳои раисони ситодҳои вилоятӣ ва шаҳрӣ оид ба пешгирӣ аз паҳншавии бемории коронавирус роҳандозӣ карда шуданд.
Тибқи иттилои манбаъ, корҳои безараргардонӣ дар кӯчаҳои микроноҳияҳои 31, 32, 33, кўчаҳои Аминҷон Расулов, Фирдавсӣ, Шарқ ва хиёбони Исмоили Сомонӣ бо сафарбаркунии мошинҳои махсус ва дастгоҳҳои безараргардонӣ анҷом ёфтааст.
“Инчунин корҳои безараргардонӣ дар ҳудуди бозори марказии “Панҷшанбе”, ки макони серодам маҳсуб меёбад ва мавзеъҳои фароғатию истгоҳҳои нақлиётии ҳудуди он ба роҳ монда шуданд”, - таъкид доштааст манбаъ.
Мақомоти Хуҷанд риоя нагардидани тавсияҳои Вазорати тандурустӣ ва ҳифзи иҷтимоии аҳолии Тоҷикистон аз ҷониби шаҳрвандон ва марказҳои савдою хизматрасонӣ нигарон кардааст.
Манбаъ қайд кардааст, ки аз сӯи сокинон ва марказҳои савдою хизматрасонӣ бе масъулиятӣ дида мешавад.
Бори дигар мақомот аз сокинон хоҳиш кардааст гигиенаи шахсию ҷамъиятиро риоя намоянд.