ДУШАНБЕ, 14 июл — Sputnik. Жиргалбек У.К. яке аз даҳҳо муҳоҷире, ки дар пайи ноором кардани вазъият назди метрои "Кузминки" боздошт шудааст, мегӯяд аслан дар ин муноқиша иштирок накард ва танҳо аз пайи кори худ бо ҳамин масир равон буду аз ҷониби кормандони пулис боздошт шуд, менависад РИА Новости аз қавли ин муҳоҷири боздоштшуда.
Ба иттилои манбаъ, ҳоло дасти кам 102 шаҳрвандони кишварҳои Осиёи Марказӣ дастгир ва дар бозоштгоҳҳои пойтахт нигаҳдорӣ мешаванд.
Додгоҳ ҳам то ҳол қарори дахлдор дар мавриди ихроҷ кардани ҳамаи боздоштшудаҳоро набаровардааст.
Манбаъ меафзояд, дар ин занозанӣ аслан шаҳрвандони Тоҷикистону Қирғизистон ва Ӯзбекистону Туркманистон иштирок карданд.
Ҳарчанд қаблан танҳо аз иштироки шаҳрвандони тоҷику қирғиз хабар дода мешуд.
Манобеи РЕН-ТВ як рӯз қабл навишта буд, ки занозанӣ пас аз он сар шуд, ки рӯзи 11 июл дар қаламрави Химки ду муҳоҷири қирғиз аз дасти тоҷикон корд хӯрданд. Ва сипас бегоҳи рӯзи 12 июл назди метрои "Кузминки" намояндагони ду кишвар барои равшанӣ андохтан ба асли воқеа ҷамъ омаданд.
Аммо гирд омадани онҳо боиси масдуд шудани ҳаракати нақлиёт дар ин масир ва ҳамзамон сар задани бетартибиҳо шуд, ки дар натиҷа кормандони пулис 102 нафарро боздошт карданд. Ҷамъан дар ин занозанӣ зиёда аз 200 нафар ширкат варзиданд.
Рӯзи гузашта роҳбари Созмони ҷамъиятии "Рушди муҳоҷират" ҳам изҳор дошт, ки нофаҳмӣ миёни шаҳрвандони Тоҷикистону Қирғизистон сар зад ва рӯзи 15 июл гӯё миёни намояндагони ин ду кишвар "суҳбати мардона" баргузор мешавад.