ДУШАНБЕ, 7 июл — Sputnik. Ҳодисаи нохуши нақлиётӣ дар ноҳияи Хуросон бо марги ронанда анҷомид, хабар медиҳад Вазорати корҳои дохилӣ.
Бино ба гузориши ин ниҳод, ҳодиса рӯзи 6-уми июл, тахминан соати 11:00 рух додааст.
Гуфта мешавад, ки садамаи маргбор зимни ҳаракати ронанда аз шаҳри Душанбе ба шаҳри Бохтар ба вуқӯъ пайвастааст.
Ронандаи худрави “Деу-Сиело”, Х.Э.С сокини 61-солаи ҷамоати деҳоти С. Айнии ноҳияи Хуросон дар ҳудуди деҳоти С.Айнӣ, аз уҳдаи идораи нақлиёт набаромада, ба канори рости роҳ баромада чаппа шудааст.
"Дар натиҷа ронанда ҷароҳати ҷисмонӣ бардошта, дар ҷойи ҳодиса ба ҳалокат расидааст", - омадааст дар хабарнома.
Манбаъ афзуда, ки аз рӯи ин ҳодиса тафтишот идома дорад.