ДУШАНБЕ, 2 июл — Sputnik. Раҷаб Тайиб Эрдуғон бо даъвати ҳамтои тоҷикаш Эмомалӣ Раҳмон бо як сафари расмӣ ба Тоҷикистон меояд.
Дар ин бора Вазири мудофиаи миллии Туркия Хулусӣ Акар, ахиран зимни мулоқот бо расонаҳо оид ба натиҷагирии дидораш бо президенти Тоҷикистон дар Душанбе хабар дод.
Хулусӣ Акар гуфт, президенти Тоҷикистон Эмомалӣ Раҳмон раисиҷумҳури Туркия Раҷаб Тайиб Эрдуғонро ба Тоҷикистон бори дигар расман даъват намуд.
"Ман ба Президенти Ҷумҳурии Тоҷикистон муҳтарам Эмомалӣ Раҳмон дар бораи нияти Президенти Ҷумҳурии Туркия вобаста ба анҷом додани сафар дар ояндаи наздик ба Тоҷикистон хабар додам", — гуфт Хулусӣ Акар.
Номбурда ҳамчунин изҳори боварӣ намуд, ки сафар ва мулоқотҳои дуҷонибаи роҳбарони сатҳи олии ҳарду кишвар барои боз ҳам ба сатҳи баланд баровардани ҳамкорӣ байни вазоратҳои мудофиа такони тоза мебахшанд.
Ӯ дар идомаи суҳбаташ бо истиқбол аз ҳамкориҳои ду кишвар гуфт, Туркия Тоҷикистонро ҳамчун кишвари дӯсту бародар ва шарики муҳим дар минтақаи Осиёи Марказӣ меҳисобем.
Ҳарду кишвар арзишҳои умумӣ доранд, ки яке аз онҳо асари безаволи Мавлоно Ҷалолиддин Румӣ мебошад, ки мардумони мо имрӯз аз он баҳра бурда истодаанд, таъкид кард Хулусӣ Акар