ДУШАНБЕ, 22 июн - Sputnik. Ҳукумати Ӯзбекистон бори дигар ташхиси ПСР - ро барои ҳамаи шаҳрвандони хориҷӣ ҳатмӣ кард.
Дар ин бора Sputnik Ӯзбекистон бо такя ба Вазорати тандурустии кишвар хабар медиҳад.
"Хадамоти беҳдошти санитарию эпидемиологӣ барои ашхосе, ки тавассути гузаргоҳҳои сарҳадӣ ба Ҷумҳурии Ӯзбекистон ворид мешаванд, низоми санҷиши ҳатмӣ бо истифода аз усули ПСР - ро ҷорӣ мекунад", - омадааст дар иттилоия.
Ҳамчунин, дар давоми ҳафт рӯз пас аз ворид шудан ба қаламрави Ӯзбекистон, шаҳрванди хориҷӣ бояд дигарбора аз санҷиш гузарад.
Ёдрас мешавем, ки Ҳукумати Ӯзбекистон аз 15 августи соли 2020 маҳдудиятҳои ковидиро сабук кард.
Аз 1 октябр сарҳадҳо барои вуруд ва баромади ҳама гуна намуди нақлиёт кушода шуданд ва сайёҳати дохилӣ иҷозат дода шуд.
Аз меҳмонон талаб карда шуд, ки ташхиси манфии коронавирусро пешниҳод кунанд.
Рӯзи 25 декабр дар фурудгоҳҳо, истгоҳҳои роҳи оҳан ва нуқтаҳои марзӣ экспресс-санҷишҳои ҳатмӣ ҷорӣ карда шуданд.
Аммо, аз 15 март, санҷиши ҳатмӣ низ бекор карда шуда буд.