ДУШАНБЕ, 22 июн — Sputnik. Ба иттилои дафтари матбуоти вазорати меҳнат, муҳоҷират ва шуғли аҳолӣ, ахиран Ширин Амонзода Вазири меҳнати Тоҷикистон бо соҳибкори шинохта ва машваратчии соҳаи тиҷорату иқтисод Саидмурод Давлатов мулоқот анҷом додааст.
“Зимни мулоқот, тарафҳо масъалаҳои таъсиси ҷойҳои нави корӣ аз ҳисоби рушди соҳибкорӣ ва сармоягузорӣ, танзими муносибатҳои меҳнатӣ ва ҷалби қувваи кории хориҷӣ, махсусан омӯзгорон аз хориҷи кишвар ҷиҳати роҳандозии фаъолияти мактаби Оксфорд дар шаҳри Хуҷанд, мавриди баррасӣ қарор дода шуданд”, - таъкид доштааст манбаъ.
Ҳамзамон манбаъ қайд кардааст, ки дар мулоқот масъалаи тайёр кардани кадрҳои мутобиқ ба бозори меҳнати байналмилалӣ, роҳҳои ҷалб намудани ҷавонон ба тиҷорат ва муҳайё намудани заминаҳои ҷойҳои корӣ мавриди муҳокима қарор дода шуданд.
Соҳибкори тоҷик зимни дидор бо вазир қайд кардааст, ки рушд ёфани соҳибкорӣ ба таъсиси ҷойҳои нави корӣ сабаб гардида, барои ба шуғл фаро гирифтани аҳолӣ ва рушди иқтисоди миллӣ заминаи асосиро фароҳам меорад.