ДУШАНБЕ, 3 июн — Sputnik. Сафари раисиҷумҳури Тоҷикистон, Эмомалӣ Раҳмон ба Ҷумҳурии Исломии Покистон анҷом ёфт, хабар медиҳад котиботи раисиҷумҳур.
Ин сафар аз 2 то 3 июн идома ёфт ва Эмомалӣ Раҳмон бо кишвардору сарвазири Покистон ва дигар намояндагони воломақоми он кишвар мулоқот ва вохӯриҳо доир намуд.
Роҳбари давлат аз ҷумла 12 санади нави танзимкунандаи робитаҳо дар бахшҳои савдову саноат, нақлиёт, илму маориф, фарҳангу санъат ва ғайра ба имзо расонд.
Котиботи Президент мегӯяд, Эмомалӣ Раҳмонро дар фурудгоҳи байналмилалии шаҳри Исломобод, намояндагони воломақоми он кишвар гусел намуданд.
Ёдовар мешавем, ки Эмомалӣ Раҳмонро дар ин сафар, вазири корҳои хориҷӣ Сироҷиддин Муҳриддин ва ёвари Президент дар масоили робитаҳои хориҷӣ ҳамроҳӣ намуданд.
Ҳамчунин, вазирони нақлиёт, фарҳанг, маориф ва илм, директори Агентии назорати давлатии молиявӣ ва мубориза бо коррупсия, раисони Кумитаи ҳолатҳои фавқулода ва мудофиаи гражданӣ, Палатаи савдо ва саноат ва дигар шахсони расмӣ низ ҳамроҳи роҳбари давлат ба Покистон сафар намуда буданд.