ДУШАНБЕ, 2 июн — Sputnik. Муноқишаи марзии Тоҷикистону Қирғизистон аз марҳилаи гарм ба марҳилаи сард гузашт.
Ҳарду ҷониб омодагии худро барои ҳалли мушкилот бо роҳи дипломатӣ эълом мекунанд, аммо ҳоло вуруди тоҷикон ба Қирғизистон "то ҳалли масоили баҳсӣ" манъ аст ва касе дақиқ намедонад, ки оё Душанбеи расмӣ чораҳои оинавӣ хоҳад андешид ё хайр?
Бадтар аз он, чунин номуайянӣ на танҳо эътимоди мақомоти ду кишварро ба якдигар заиф месозад, балки тухми хусуматро дар зеҳн ва қалби шаҳрвандони оддӣ мерӯёнад, гуфт Андрей Грозин, номзади илмҳои таърих, сарвари Шӯъбаи Институти кишварҳои ИДМ .
"Масъала музмин аст ва гумон кардан нодуруст аст, ки онро бо як ҳамлаи савора мешавад ҳал кард. Гузашта аз ин, муноқиша на танҳо бо афзоиши нобоварӣ байни мақомот, балки афзоиши хусумати байни мардум метавонад биёрад - бубинед, ки корбарони тоҷику қирғиз дар шабакаҳои иҷтимоӣ чӣ менависанд - сухан дар бораи афзоиши нафрат меравад", - мегӯяд Грозин.
Ба ақидаи ӯ, ҷонибҳо метавонистанд аз Тошканд, дурусттараш, аз президент Мирзиёев, ки дар баҳсҳои марзӣ бо мақомоти нави Бишкек созиш кард, ибрат гиранд. Ин барои нишон додани қобилият дар ҳалли масъалаҳои печидаи байналмилалӣ ва идора кардани кишвар барои раҳбарияти нави Қирғизистон бисёр зарур аст.
Мутаассифона дар мавриди Тоҷикистон ва Бишкек вазъ то андозае дигар аст.
"Ҳарду ҷониб раванди гуфтушунидро ҳамчун бозӣ аз сифр арзёбӣ мекунанд, вақте ки гузашт ба ҳамсоя ҳамчун зарари худи онҳо, зарба ба манфиатҳои миллӣ ҳисобида мешавад", - шарҳ дод коршинос дар суҳбат бо Sputnik Тоҷикистон.
Ба гуфти Грозин, ҳалли ин масъаларо дар вохӯриҳои паси парда дар чорабиниҳои ИДМ пайдо кардан мумкин аст, ки дар он Бишкек ва Душанбе бидуни гирифтани ӯҳдадориҳои аз ҳад зиёд метавонанд, мавқеи ҷониби дигарро фаҳманд ва баъзе мувофиқаҳои қобили қабулро таҳия кунанд.
Гузашта аз ин, ба сурати умум, роҳи ҳалли дигаре ба ҷуз созиш миёни Тоҷикистон ва Қирғизистон вуҷуд надорад.
Ҳардуи ин давлатҳо барои тезутунд кардани низоъ бо ҳамсоягони худ захираҳои кофӣ надоранд ва барои ҳардуи онҳо, "Ҷанги сарди сарҳадӣ" ба иқтисод зарари калон мерасонад.