ДУШАНБЕ, 19 май – Sputnik. Вазорати тандурустии Тоҷикистон мегӯяд, шабонарӯзи охир дар ҷумҳурӣ ягон ҳолати нави гирифторшавии шаҳрвандон ба бемории коронавируси нави COVID-19 ба қайд гирифта нашуд.
Охирин ҳолатҳои гирифторӣ ба коронавирус ба иттилои расмӣ даҳаи аввали моҳи январи соли равон ба қайд гирифта шуда, баъди он кишвар орӣ аз ин вирус эълон шуд.
Мақомоти Тоҷикистон мегӯянд, аз январ то 19-уми майи соли равон дар ҷумҳурӣ ягон ҳолати гирифторӣ ба COVID-19 ба қайд гирифта нашудааст. Дар маҷмуъ ба иттилои мақомоти тандурустӣ дар ҷумҳурӣ 13 308 нафар бемори коронавирус ба қайд гирифта шудаанд, ки аз ин 13218 нафар ё 99,3% шифо ёфтаанд. Инчунин, 90 нафар бар асари ин беморӣ фавтидаанд.
Ин дар ҳолест, ки шабонарӯзи охир гузоришҳо аз карантини шаҳрвандон дар шаҳрҳои Душанбе ва Хуҷанд гузориш дода мешавад.
Эмомалии Мирзо, сухангӯи Вазорати тандурустӣ, ба Sputnik Тоҷикистон гуфт, афроде, ки дар Шифохонаи маризиҳои сироятии шаҳри Хуҷанд бистарӣ шудаанд, тайи як ҳафтаи ахир тариқи фурудгоҳи шаҳрҳои Истамбули Туркия ва Дубайи Амороти Муттаҳидаи Араб вориди Тоҷикистон шудаанд.
“Тибқи қоида, ҳар шаҳрванде, ки аз хориҷа ворид мешавад, таҳти қарантина қарор мегирад. Ин афрод дар ҷойҳои сукунати худ бистарӣ мешаванд. Он 15 нафар ҳам онҳоеанд, ки сокини шаҳри Хуҷанд буда, аксарият аз Ҳиндустон ва қисме аз Туркия вориди кишвар шудаанд”, - гуфт Эмомалии Мирзо.