Музокирот дар пойтахти Қирғизистон 14 май оғоз ёфта, се рӯз идома кард. Дар натиҷа, 18 майи соли 1997 мақомоти Тоҷикистон ва Иттиҳоди оппозисиюни тоҷик аввалин санадҳоеро, ки замина барои хотимаи ҷанг шуданд, ба имзо расониданд.
Наворҳои нодири ин видеои таърихиро Sputnik Қирғизистон нашр кардааст.
Президенти Тоҷикистон Эмомалӣ Раҳмон ва роҳбари Иттиҳоди оппозисиюни тоҷик Саид Абдуллоҳи Нурӣ протокол "Дар бораи масъалаҳои сиёсӣ" -ро ба имзо расониданд.
Пас аз даҳ рӯз, дар Теҳрон Протокол дар бораи кафолати татбиқи Созишномаи умумии истиқрори сулҳ ва ризоияти миллӣ дар Тоҷикистон ба имзо расид.
Ёдовар мешавем, ки ҷанги шаҳрвандӣ дар Тоҷикистон аз соли 1992 то 1997 идома кард.
Дар давоми ҷанг, зиёда аз 60 ҳазор нафар ҳалок гардида, шумораи зиёди одамон бедарак шуданд.
Тақрибан ҳамин теъдод ба Афғонистони ҳамсоя гурехтанд. Наздики 200 ҳазор маҷбур шуданд, ки Тоҷикистонро тарк намуда, ба кишварҳои ИДМ кӯч банданд.
Дар маҷмӯъ, аз моҳи апрели соли 1994 то моҳи майи соли 1997, таҳти сарпарастии СММ ҳашт даври музокирот гузаронида шуд. Созишномаи ниҳоии сулҳ байни ҳукумати Ҷумҳурии Тоҷикистон ва Иттиҳоди мухолифини тоҷик дар шаҳри Маскав 27 июни соли 1997 ба имзо расид.