ДУШАНБЕ, 18 май - Sputnik. Видеои Манижа барои суруди Russian Woman рекорди нав дар канали расмии Eurovision Song Contest дар YouTube гузошт.
Видео рӯзи 10-уми март нашр шуд. Дар ин муддат, намоҳанги Russian Woman беш аз 10,5 миллион маротиба тамошо шудааст.
Наворро беш аз 260 ҳазор нафар писандида, тақрибан 170 ҳазор тамошобин ба он мухолифат кардаанд. Қариб 180 ҳазор корбар зери видео шарҳҳо гузоштанд.
Ҳамин тариқ, клипи Манижа Russian Woman дар Евровидение - 2021 маъруфтарин шуд.
Дар ҷои дуввум Сербия қарор дорад, ки онро гурӯҳи Hurricane бо суруди LOCO LOCO (9 миллион) муаррифӣ мекунад.
Дар зинаи саввум Малта аст, ки сароянда Destiny аз он бо суруди Je Me Casse (беш аз 7 миллион) ба Евровидение 2021 меравад.
Евровидение 2021
Озмуни Евровидение 2021 дар Роттердами Ҳолланд аз 18 то 22 май баргузор мешавад.
Ёдовар мешавем, ҷашнвори мусиқии Евровидение - 2021 имрӯз оғоз ёфт. Дар ин озмун 34 ҳунарманд сабқат мекунанд ва исми ғолиби ҷашнвора рӯзи 22 май эълон хоҳад шуд.
Дар ин озмун 39 кишвар, аз ҷумла Русия ширкат хоҳанд кард. Кишварро дар Евровидение 2021 овозхони тоҷиктабор Манижа бо суруди Russian Woman муаррифӣ мекунад.
Ҳарчанд ин тарона мавриди истиқболи гарми кишварҳои Аврупо гардид, аммо дар Федератсияи Русия онро таҳқири тамоми занони рус номиданд.